Təranə Muradova: Nar ölkəmizin milli mədəniyyətinin zənginliyini simvolizə edir

Bakı, 14 noyabr, AZƏRTAC Nar milli mətbəximizdə və ailə ənənələrimizdə xüsusi yer tutur, Azərbaycan xalqının özünəməxsusluğunu və mədəni irsini təcəssüm etdirir.Bunu AZƏRTAC-ın müxbiri ilə söhbətində Azərbaycan Rəqs Şurasının prezidenti, Xalq artisti Təranə Muradova deyib.O, rəhbərlik etdiyi “Odlar Yurdu” rəqs kollektivinin təbiətə və bitki aləminə həsr olunmuş xüsusi kompozisiyalar hazırladığını qeyd edib.“Biz tamaşaçıları mədəniyyətimizlə tanış edən tədbirlərdə hər zaman böyük məmnuniyyətlə iştirak edirik. Bu gün təbiətə və bitki aləminə həsr olunmuş kompozisiyalar hazırlamışıq. Belə bayramların hər il təkcə “Sea Breeze”də deyil, Şamaxıda və ölkəmizin digər bölgələrində də keçirilməsi məni çox sevindirir”, – deyə Xalq artisti bildirib.Müsahibimizin fikrincə, milli ənənələrin qorunub saxlanılması və gənc nəslə ötürülməsi mühüm vəzifə olaraq qalır.Təranə Muradova narla bağlı ailə ənənələrindən də danışıb: “Uşaqlıqda evimizdə mütləq nar şirəsi içilərdi. Bu ənənəni bu gün də davam etdiririk. Nənəm və valideynlərim narşərabı, ət yeməkləri üçün ədviyyatlar hazırlayardılar”, – deyə o bildirib. Müxbir – Lalə Minasazova Fotoqraf – İlkin Cavanşirov